Mikill erill og talsverð ölvun á fjölmennri Ljósanótt

Bjarney Annelsdóttir, yfirlögregluþjónn á Suðurnesjum, segir að Ljósanótt hafi almennt gengið vel þrátt fyrir mikinn eril. Vegna sérstaklega góðs veðurs í gær var mannfjöldinn með því mesta sem sést hefur í 25 ár, en því fylgdi nokkur ölvun, sérstaklega meðal ungmenna. Lögreglumenn höfðu nóg að gera eftir að formlegri dagskrá lauk, en tvær líkamsárásir voru tilkynntar þar sem ungmenni undir 18 ára aldri komu við sögu. Í öðru tilvikinu var glerflösku kastað í lögreglumann og í hinu var sparkað í höfuð liggjandi einstaklings. Fjórir gistu fangageymslur og tveir voru fluttir á Stuðla. Bjarney leggur áherslu á að gott samstarf við viðbragðsaðila og bæinn hafi tryggt að hátíðin færi vel fram heilt yfir.