Sex látnir og ellefu saknað eftir sprengingu í bólivískri herstöð

Varnarmálaráðuneyti Bólivíu staðfestir að minnst sex manns hafi týnt lífi í öflugri sprengingu sem varð í herstöð í borginni Viacha, skammt frá höfuðborginni La Paz. Ellefu er enn saknað, flestir þeirra ungir hermenn á aldrinum 18 til 19 ára. Sprengingin var svo kröftug að hún olli miklu eignatjóni í nágrenninu; hús hrundu, þök sviptust af byggingum og tré rifnuðu upp með rótum. Vitað er að lagt hafði verið hald á mikið magn sprengiefnis sem var geymt í stöðinni, en dánarorsakir og tildrög sprengingarinnar eru enn í rannsókn hjá saksóknara. Evo Morales, fyrrverandi forseti, hefur gagnrýnt núverandi stjórnvöld harðlega fyrir ábyrgðarleysi í meðferð málsins.