Von der Leyen boðar aukið samstarf ESB og Grænlands

Ursula von der Leyen, forseti framkvæmdastjórnar Evrópusambandsins, hóf í gær tveggja daga opinbera heimsókn til Grænlands. Markmið heimsóknarinnar er að efla samstarf á Norðurslóðum, sem hafa verið miðpunktur pólitískrar spennu að undanförnu. Jens-Frederik Nielsen, formaður landsstjórnar Grænlands, og Mette Frederiksen, forsætisráðherra Danmerkur, tóku á móti henni í Nuuk. Von der Leyen lagði áherslu á að Grænland tilheyri Evrópu og búist er við að hún kynni verulegan stuðningspakka í dag. Samkvæmt heimildum Financial Times gæti verið um að ræða tvöföldun á aðstoð sambandsins, sem myndi nema um 75 milljörðum króna á næstu árum. Samhliða heimsókninni hefst NATO-heræfingin Arctic Shield á grænlenskri grundu með þátttöku tíu ríkja.