PISA-niðurstöður verða opinberaðar á morgun

Niðurstöður PISA-könnunarinnar 2025 verða kynntar á blaðamannafundi í Safnahúsinu klukkan ellefu á morgun. Inga Sæland, mennta- og barnamálaráðherra, ásamt borgarstjóra og fulltrúum ráðuneytisins, munu kynna málið. Alls tóku tæplega fjögur þúsund íslenskir nemendur þátt í könnuninni, sem er á vegum OECD og mælir hæfni 15 ára nemenda í lesskilningi og læsi á náttúruvísindi og stærðfræði. Síðustu niðurstöður frá 2022 sýndu verulega hnignun á færni íslenskra grunnskólabarna, en þá mældist hún undir meðaltali OECD-ríkja í öllum flokkum. Nú ríkir eftirvænting um hvort sú þróun hafi snúist við.