Snör handtök komu í veg fyrir stórbruna á Akureyri

Slökkviliðið á Akureyri var kallað út að Alþýðuhúsinu í morgun vegna elds í millivegg á efstu hæð hússins, þar sem veitingastaðurinn Strikið er til húsa. Starfsmaður staðarins varð eldsins var og tókst honum að ráða niðurlögum hans að mestu áður en slökkvilið kom á vettvang. Húsið var rýmt á meðan slökkviliðsmenn tryggðu að engar glæður leynust í veggjum. Vigfús Ólafur Bjarkason, varðstjóri slökkviliðsins, hrósar starfsmanninum fyrir snör handtök sem reyndust afgerandi. Engin meiðsl urðu á fólki og skemmdir eru taldar óverulegar.