Ferðaþjónustan gagnrýnir boðaða gjaldtöku í fjárlagafrumvarpi

Samtök ferðaþjónustunnar (SAF) lýsa yfir miklum vonbrigðum með nýtt fjárlagafrumvarp þar sem boðuð er aukin gjaldtaka á greinina og hækkun virðisaukaskatts á baðlón. Pétur Óskarsson, formaður SAF, telur að þessar álögur muni draga úr mætti ferðaþjónustunnar og bitna sérstaklega á fyrirtækjum á landsbyggðinni. Gert er ráð fyrir að aðgerðirnar skili ríkissjóði um níu milljörðum króna, en Samtökin telja stjórnvöld kasta krónunni fyrir aurinn með því að hamla vexti einnar mikilvægustu útflutningsgreinar þjóðarinnar.