Óánægja með stjórnarbreytingar hjá Norðurorku

Fulltrúar minni sveitarfélaga við Eyjafjörð lýsa yfir áhyggjum vegna breytinga á stjórn Norðurorku, en þær fela í sér að sveitarfélögin missa áheyrnarfulltrúa sinn. Hermann Ingi Gunnarsson, oddviti Eyjafjarðarsveitar, segir breytinguna auka tortryggni í garð stjórnarinnar. Akureyrarbær, sem á yfir 98% hlut í fyrirtækinu, hefur innleitt nýja eigendastefnu þar sem fagfólki er fjölgað í stjórn á kostnað pólitískra fulltrúa. Markmið Akureyrarbæjar er að gera reksturinn faglegri og draga úr pólitískum áhrifum. Á sama tíma hafa sveitarfélög eins og Hörgársveit og Grýtubakkahreppur gagnrýnt lántökur og mögulegar duldar arðgreiðslur fyrirtækisins.