2.511 undirskriftir afhentar heilbrigðisráðherra vegna Kristness

María Pálsdóttir, fyrir hönd velunnara Kristness, afhenti Ölmu D. Möller heilbrigðisráðherra 2.511 undirskriftir þar sem skorað er á stjórnvöld að bregðast við ástandi Kristnesspítala. Húsnæðið glímir við verulegan mygluvanda sem varð til þess að rýma þurfti spítalann fyrr á árinu. Göngudeild endurhæfingar SAk er nú á leið í leiguhúsnæði á Akureyri. Ráðherra segir málið í skoðun og að verið sé að kostnaðarmeta viðgerðir, en horfa þurfi bæði til þjónustunnar og ástands húsnæðisins. Starfsfólk endurhæfingarþjónustunnar á Kristnesi hefur einnig sent ráðherra opið bréf þar sem lýst er vilja til að tryggja áframhaldandi þjónustu á staðnum.