Meiri stuðningur við einkarekna fjölmiðla en dregið úr auglýsingatekjum RÚV

Samkvæmt nýju fjárlagafrumvarpi mun beinn stuðningur við einkarekna fjölmiðla aukast verulega á næsta ári, en framlög hækka úr 668,3 milljónum króna í tæpar 946 milljónir. Upphaflega stóð til að bæta 300 milljónum við pottinn fyrir ritstjórnir einkamiðla, en eftir almenna sparnaðarkröfu hljóðar hækkunin upp á um 278 milljónir króna.

Miklar breytingar hafa verið á fjölmiðlamarkaði undanfarið, meðal annars þegar Sýn hætti framleiðslu sjónvarpsfrétta í byrjun september, sem markaði lok 40 ára sögu frétta á Stöð 2. Auglýsingakaup á Íslandi námu 29,4 milljörðum króna árið 2024, en yfir helmingur þeirrar upphæðar rann til alþjóðlegra tæknirisa á borð við Google og Meta.

Í frumvarpinu er einnig gert ráð fyrir að ríkissjóður yfirtaki 4 milljarða króna skuldabréf RÚV vegna lífeyrisskuldbindinga. Samhliða á að skerða leyfilegar auglýsingatekjur RÚV til að draga úr samkeppni og beina meira fjármagni til einkamiðla. Þá er gert ráð fyrir að útvarpsgjald hækki um 5,2%.