Kort Trumps: Grænlendinga sjálfra að ákveða framtíð sína
<p>Mette Frederiksen forsætisráðherra Danmerkur segir heimsbyggðina alla og Bandaríkjamenn ekki síst þurfa að skilja að það sé Grænlendinga sjálfra að ákveða örlög sín og framtíð.</p><p>Fredriksen ítrekaði þetta í gær eftir að sjá mátti Grænland þakið bandarísku fánalitunum á korti sem Donald Trump Bandaríkjaforseti birti á samfélagsmiðlinum Truth Social Litirnir féllu einnig yfir Mið-Ameríku, Kanada og Ísland.</p><p>Mette Frederiksen var stödd á Grænlandi og sagði í samtali við <a href="https://www.dr.dk/nyheder/seneste/mette-frederiksen-reagerer-paa-trump-kort-med-groenland">danska ríkisútvarpið</a> að heimastjórnin og Grænlendingar sjálfir hefðu ítrekað aftekið að gerast Bandaríkjamenn. Enginn skyldi velkjast í vafa um það, hvorki Bandaríkjamenn né aðrir.</p><p>Frederiksen klykkti loks út með að árétta að Grænland væri alls ekki til sölu. Í gær var gerður samningur milli Danmerkur, Grænlands og Evrópusambandsins um fjárfestingar <a href="https://www.ruv.is/frettir/erlent/2026-09-07-esb-eykur-fjarfestingu-a-graenlandi-medal-annars-i-fjarskiptum-486299">sambandsins á Grænlandi</a> að jafnvirði 56 milljarða íslenskra króna.</p><p>Þorgerður Katrín Gunnarsdóttir utanríkisráðherra kallaði Billy Long sendiherra Bandaríkjanna <a href="https://www.ruv.is/frettir/erlent/2026-09-07-utanrikisradherra-kalladi-sendiherra-a-fund-vegna-myndbirtingar-bandarikjaforseta-486335">á sinn fund í gær</a> og tjáði honum að færsla Trumps væri allsendis óviðeigandi.</p>