Íkveikja á heimili: „Mjög slæm tilfinning“

Heimir Björn Janusarson, garðyrkjufræðingur í Vesturbæ Reykjavíkur, segir það vera skelfilega upplifun að verða fyrir árás á heimili sitt. Eldur var borinn að bréfalúgu á heimili hans og konu hans, Sólveigar Ólafsdóttur, snemma í morgun. Eldinn uppgötvaði Heimir þegar hann fór á fætur til vinnu en hann telur að eldurinn hafi slokknað af sjálfsdáðum. Greinilegt var að Morgunblaði hafði verið stungið í gegnum lúguna og kveikt í því með eldfimum vökva. Þrátt fyrir tjón á forstofu og fatnaði sakaði engan, en Heimir segist upplifa mikið áfall vegna atviksins. Lögregla og tryggingafélag hafa verið kölluð til vegna málsins.