Ný kennsluaðferð gæti skilað betri árangri

Nýjar rannsóknir á sviði læsisfræði gætu falið í sér lykilinn að betri árangri íslenskra grunnskólanema í lesskilningi. Sigríður Ólafsdóttir, dósent við Háskóla Íslands, segir að þrátt fyrir að vísindaleg þekking á læsi hafi fleygt fram síðustu áratugi, hafi íslensk menntayfirvöld verið treg til að byggja aðgerðir á tölfræðilegum gögnum. Niðurstöður nýrrar kennsluaðferðar, sem byggir á íslenskum námsorðaforða, lofa hins vegar góðu og sýndu framúrskarandi árangur í prófunum síðastliðið haust. Frammistaða íslenskra nemenda í PISA-könnunum hefur aldrei mælst lakari en nú, þar sem tæpur helmingur nemenda skortir grunnhæfni í lesskilningi, og er því mikil áhersla lögð á að efla orðaforða sem lykilþátt í námi.