Flores óskar eftir flutningi í stofufangelsi vegna heilsubrests

Cilia Flores, fyrrum forsetafrú Venesúela, hefur óskað eftir því að vera færð úr fangelsi í stofufangelsi vegna versnandi heilsu. Flores og eiginmaður hennar, Nicolas Maduro fyrrum forseti, voru handtekin í sérstakri aðgerð Bandaríkjahers fyrr á árinu og sitja nú í varðhaldi í Bandaríkjunum. Lögfræðingur Flores, sem er 69 ára gömul, fullyrðir að heilsu hennar hafi hrakað mjög í fangelsinu vegna skorts á fullnægjandi læknisþjónustu. Farið er fram á að hún fái að sitja í stofufangelsi undir stöðugu eftirliti með rafrænu ökklabandi. Hjónin eru ákærð fyrir aðild að umfangsmiklu kókaínsmygli til Bandaríkjanna en þau neita bæði sök. Maduro hefur einnig lýst því yfir að hann telji sig vera stríðsfanga Bandaríkjanna.