Svínvetningabraut í Húnabyggð í verulega slæmu ástandi
Hættulegar aðstæður hafa skapast á Svínvetningabraut í Húnabyggð vegna mikilla skemmda á veginum. Sveitarstjóri segir Vegagerðina hafa lofað úrbótum en ekkert hafi gerst fyrr en nýlega þegar fjármagn fékkst loksins í verkið.
Ástandið á Svínvetningabraut í Húnabyggð er orðið afar slæmt og geta hættulegar aðstæður skapast fyrir vegfarendur. Slitlagið er víða horfið á löngum köflum og holur eru algengar. Pétur Arason, sveitarstjóri Húnabyggðar, segir að vegurinn sé mikilvæg lífæð fyrir svæðið, enda keyri skólabíllinn þessa leið daglega og umferð til og frá Blönduvirkjun sé mikil. Vegagerðin hefur staðfest að viðgerðir eigi að hefjast í haust eftir að fjármagn fékkst í verkefnið. Styrkja á burðarlag vegarins og leggja nýja klæðingu til að tryggja öryggi vegfarenda.
