Segja ekki hægt að mæta launakrofum flugvirkja

<p>Atkvæðagreiðsla félagsmanna Flugvirkjafélags Íslands lauk í hádeginu. Niðurstaðan var afgerandi; verkfallsboðun var samþykkt með áttatíu og átta komma þremur prósentum greiddra atkvæða.</p><p>Bjarni Benediktsson, framkvæmdastjóri Samtaka atvinnulífsins, er ekki bjartsýnn á að samningar náist milli flugvirkja og Icelandair, enda sé félagið ekki í neinni stöðu til að mæta kröfum flugvirkja.</p><p>„Þetta er mjög þröng staða vegna þess að það ber mikið í milli samningsaðilana og mér líst bara ekkert allt of vel á stöðuna.“</p><p>Flugvirkjar hjá Icelandair fara að óbreyttu í verkfall frá og með miðvikudeginum í næstu viku. Framkvæmdastjóri Samtaka atvinnulífsins segir ekki hægt að mæta launakröfum flugvirkja.</p><h3>Kröfurnar langt umfram svigrúm félagsins</h3><p>Ótímabundin verkföll flugvirkja hjá Icelandair hefjast á miðnætti 23. september. Bjarni segir kröfur flugvirkja langt umfram það svigrúm sem Icelandair hefur. Í tilkynningu Icelandair segir að félagið hafi lagt fram sanngjarnt og ábyrgt samningstilboð. Bjarni segist ekki eiga von á að frekari samningar verði lagðir fram.</p><p>„Ég held að Icelandair muni halda sig við það tilboð sem er á borðinu og samrýmist öðru því sem samið hefur verið um.“</p><p>Nái Icelandair ekki að gera samning við Flugvirkjafélag Íslands áður en verkfall skellur á hefur það veruleg áhrif á flugáætlun Icelandair. Félagið segist nú ætla að meta möguleg áhrif verkfalls á farþega.</p><p>Óskar Einarsson, formaður Flugvirkjafélags Íslands og samninganefndar félagsins, segir ljóst að verkfall komi til með að hafa áhrif á starfsemi Icelandair; endanlegt markmið sé að fá Icelandair að samningaborðinu.</p><p>„Við erum ekki að dagsetja neitt eða telja eitthvað í dögum, tilgangurinn er að ná kjarasamningi og við erum tilbúin að setjast að samningaborðinu um leið og kallið berst.“</p>