Danir segja rússneskt herskip hafa skotið blysum að þyrlu

Mette Frederiksen, forsætisráðherra Danmerkur, hefur gagnrýnt Rússa harðlega og sakað þá um „glannalega“ hegðun á Eystrasalti. Tilefnið er atvik þar sem rússneskt herskip er sagt hafa skotið ljósblysum í átt að danskri herþyrlu sem var í reglulegu eftirlitsflugi. Stjórnvöld í Kreml hafa enn ekki tjáð sig um málið, en spenna á svæðinu hefur farið vaxandi undanfarin misseri. Danir telja þetta skýrt dæmi um ögrun af hálfu rússneska hersins.