Ósammála Fjölmiðlanefnd: Telja hlaðvarpið „Komið gott“ ekki vera fjölmiðil

Fjölmiðlanefnd hefur komist að þeirri niðurstöðu að hlaðvarpið „Komið gott“ teljist fjölmiðill samkvæmt lögum. Nefndin hefur beint þeim tilmælum til stjórnenda að skrá hlaðvarpið sem slíkt eða koma frekari skýringum á framfæri. Ólöf Skaftadóttir, annar stjórnenda þáttarins, vísar þessu alfarið á bug. Hún segir að það sem hún og Kristín geri í hlaðvarpinu eigi ekkert skylt við hefðbundna fjölmiðlun, enda séu þættirnir fyrst og fremst byggðir á gríni og spjalli. Mat nefndarinnar byggir á því að miðlað sé ritstýrðu efni með reglubundnum hætti og að fjárhagslegur ávinningur sé af starfseminni. Ólöf spyr hvar mörkin liggi og hvort eftirlitið eigi einnig að ná yfir matarbloggara og Onlyfans-notendur. Hún segir andspyrnuna vera heilbrigða gagnvart því sem hún kallar „stjórnlyndisrugl“.