ÍR-konur fóru létt með KA/Þór í Breiðholti

ÍR tók á móti KA/Þór í þriðju umferð Olísdeildar kvenna í handbolta í dag. Heimakonur í Breiðholti sýndu mikla yfirburði strax frá upphafi leiks. ÍR náði forystunni snemma og þegar um 13 mínútur voru liðnar af leiknum var staðan orðin 6-1. Liðið stýrði leiknum eftir það og hleypti gestunum aldrei nærri sér. Lokatölur urðu 23-16, öruggur sjö marka sigur ÍR. Sara Dögg Hjaltadóttir átti stórleik og skoraði alls 12 mörk fyrir ÍR. Í öðrum leik dagsins vann ÍBV dramatískan sigur á Selfossi, 36-34, þar sem Birna Berg Haraldsdóttir skoraði 10 mörk fyrir Eyjakonur.