Krúttlegir gestir leituðu lækninga á Bangsaspítalann

Það var líf og fjör á Bangsaspítalanum í dag þegar fjöldi barna mætti með uppáhaldsbangsana sína til skoðunar. Eftir að hafa innritað sjúklingana voru börnin leidd inn á læknastofur af bangsalæknum, sem eru læknanemar á fyrstu árum námsins. Þar fengu bangsarnir alla þá aðhlynningu sem þeir þurftu á að halda, hvort sem það voru plástrar eða ítarlegri rannsóknir. Bangsaspítalinn er vinsæll árlegur viðburður sem þjónar tveimur markmiðum: að draga úr ótta barna við heilbrigðiskerfið og gefa læknanemum tækifæri til að æfa samskipti við börn á leikandi hátt.