Fjölgun opinberra starfa nær ekki til Norðurþings og Skagafjarðar
Þrátt fyrir almenna fjölgun opinberra starfa á landsvísu hefur þeim fækkað í Norðurþingi og Skagafirði síðustu ár.
Á meðan opinberum störfum hefur fjölgað um ríflega 2% á landsvísu síðustu tvö ár, horfir staðan öðruvísi við íbúum í Norðurþingi og Skagafirði. Í Norðurþingi hefur stöðugildum fækkað um tæp 10%, sem samsvarar 24 störfum á tveimur árum.
Helena Eydís Ingólfsdóttir, forseti sveitarstjórnar í Norðurþingi, bendir á að fjölgað hafi í öðrum sveitarfélögum á Norðurlandi eystra. Sveitarstjórnin hefur hvatt stjórnvöld til að staðsetja nýja starfsstöð Stofnunar atvinnuveganna á Húsavík til að sporna við þessari þróun, enda hafi fækkað um 100 manns í sveitarfélaginu á stuttum tíma. Einnig hefur verið lýst yfir áhuga á að hýsa Tækniskólann í bænum.
