Enn takast á ríki ESB um rússneska auðmenn á bannlista

Enn er mikil óvissa um örlög rússnesku ólígarkanna Alisher Usmanov og Mikhail Friedman, en deilt er um hvort þeir eigi að vera áfram á refsiaðgerðalista Evrópusambandsins. Frakkar og yfirvöld í Lúxemborg hafa beitt sér fyrir því að þeir verði teknir af listanum, en aðrar þjóðir hafa mótmælt því harðlega. Usmanov er Íslendingum kunnur þar sem hann átti að fá risalán hjá Kaupþingi skömmu fyrir bankahrunið 2008, þótt ekkert hafi orðið af því. Hann átti einnig hlut í Arsenal um tíma. Niðurstaða í málinu verður að nást fyrir lok dags til að koma í veg fyrir að núverandi refsiaðgerðir renni út.