Hvöss suðvestanátt og skúrir en hlýtt á Austurlandi

Veðurhorfur dagsins benda til þess að suðvestanáttin verði nokkuð stíf, eða á bilinu 10 til 18 metrar á sekúndu. Búast má við skúrum í flestum landshlutum en þó er útlit fyrir að það haldist að mestu þurrt á Austurlandi. Þar verður einnig hlýjast í dag og gæti hiti farið í allt að 15 stig þar sem vindur er hægari.

Þegar líður á kvöldið er útlit fyrir að dragi úr vindi. Á morgun er spáð áframhaldandi suðvestanátt, 5 til 13 metrum á sekúndu, með skúrum en bjartviðri á Norðaustur- og Austurlandi. Hiti verður á bilinu 7 til 15 stig yfir daginn.