Nýtt innviðagjald á ferðamenn á að skila 6 til 7 milljörðum króna

Stjórnvöld stefna að því að innheimta sex til sjö milljarða króna árlega með nýju náttúru- og innviðagjaldi. Gjaldið verður lagt á ferðamenn sem heimsækja Gullfoss, Geysi og Þingvelli, en gert er ráð fyrir að það nemi 4.500 krónum fyrir fullorðna. Fólk með skattalega heimilisfesti á Íslandi mun ekki þurfa að greiða gjaldið. Samhliða upptöku þessa gjalds munu bílastæðagjöld á þessum stöðum falla niður. Áætlað er að hefja innheimtu þann 1. maí næstkomandi, en frumvarpsdrögin liggja nú fyrir í samráðsgátt stjórnvalda.