Ungir órangútanar læra af öðrum til að breikka fæðuvalið
Ný rannsókn sýnir að órangútanar sem eiga erfitt með að finna sér fæðu sjálfir geta vegið það upp með því að fylgjast vel með og herma eftir öðrum í hópnum.
Ungir órangútanar sem eyða litlum tíma í að átta sig sjálfir á því hvernig eigi að byggja upp fjölbreytt fæðuval geta bætt það upp með því að fylgjast með hvað aðrir órangútanar velja sér að borða. Þetta sýna niðurstöður nýrrar rannsóknar sem benda til þess að dýrin notist við mismunandi aðferðir til að þróa lífsafkomu sína. Rannsakendur við Max Planck stofnunina í Þýskalandi greindu tæplega 7.000 tilfelli náms hjá órangútönum á Súmötru í Indónesíu yfir 12 ára tímabil. Ungviðið þarf að tileinka sér gríðarlega þekkingu áður en það getur bjargað sér sjálfstætt, sem gerist um sjö til átta ára aldur. Þetta felur í sér að vita hvaða fæða er örugg, hvar hana er að finna og hvernig eigi að vinna hana úr erfiðum skeljum eða ávöxtum. Rannsóknin staðfestir að félagslegt nám, þar sem dýrin herma eftir öðrum, skiptir sköpum fyrir þau sem eru síður tilraunaglöð á eigin spýtur.
