Úrhellisrigning og stormur á Suðausturlandi — Veðurstofan varar við vatnavöxtum
Gular viðvaranir eru í gildi vegna mikillar rigningar á Suðausturlandi. Búast má við vatnavöxtum, flóðum og skriðuföllum í dag.
Veðurstofa Íslands hefur gefið út gular viðvaranir fyrir Suðausturland og sunnanvert miðhálendið vegna úrhellisrigningar sem stendur yfir fram eftir degi. Varað er við auknum vatnavöxtum í ám og lækjum, sem eykur hættu á flóðum og skriðuföllum sem gætu raskað samgöngum og valdið tjóni.
Í Kvískerjum hefur mælst umtalsverð úrkoma, eða tæpir 58 millímetrar frá miðnætti. Veðrinu á landinu er lýst sem blautu og hvössu, og er stormur syðst á landinu. Þó svo að það birti til seinnipartinn í dag er um skammgóðan vermi að ræða þar sem aftur hvessir og bætir í úrkomu í kvöld.
Á morgun er spáð sunnan og suðaustan átt, 13–18 metrum á sekúndu, en allt að 23 metrum austantil. Búist er við að draga muni úr vindi og úrkomu annað kvöld. Hiti verður á bilinu 7 til 15 stig, en hlýjast á Norðurlandi.
