Hvassir vindstrengir á Suðausturlandi

Búast má við hvössum suðvestan- og vestanvindstrengjum á suðausturhorni landsins í dag, sérstaklega í Mýrdal og Öræfum. Vegfarendur, og þá sérstaklega þeir á viðkvæmum ökutækjum, eru hvattir til að sýna fyllstu varúð. Annars staðar er von á vætu en þurrt verður að mestu á Austfjörðum. Veðurstofan gerir ráð fyrir að það dragi úr vindi síðdegis og frysti víða um land annað kvöld. Fólk er hvatt til að fylgjast með nýjustu spám þar sem hálka gæti myndast í innsveitum norðaustanlands.