Arctic Fish sækir flothring úr fjöru við Patreksfjörð í næstu viku

Flothringur af sjókví hefur legið í fjöru í sunnanverðum Patreksfjörði síðan um miðjan september. Hringurinn losnaði vegna veðurs og var ekki í notkun þegar hann strandaði. Björgunarsveitin á Patreksfirði reyndi að draga kvína á flot aftur en það tókst ekki vegna slæms veðurs.

Einar Helgason, formaður strandveiðifélagsins Króks, varaði við hættu flothringanna. Hann segir þá vera stóra og þunga fyrirbæri sem sjáist illa í sjó og séu sérstaklega hættuleg smábátum þegar þau eru á reki. "Bátur getur hæglega, ef hann er á mikilli ferð, farið á hvolf við að sigla á svona hring," segir Einar.

Eftir umfjöllun fréttastofu hafði Umhverfis- og orkustofnun samband við Arctic Fish. Sigríður Magnúsdóttir, teymisstjóri í teymi eftirlits stofnunarinnar, segir að fyrirtækið hafi heitið því að fara í næstu viku og ná hringnum úr fjörunni. "Ef að fyrirtækið gerir það ekki þá munum við fylgja því eftir með þvingunarúrræðum," segir hún.

Þetta er ekki í fyrsta sinn sem sjókví rekur á land í Patreksfirði. Síðasta vetur strandaði kví í eigu Arnarlax á sömu slóðum, og svona ramma rak einnig á land árið 2020 og 2024. Umhverfis- og orkustofnun bendir fólki á að tilkynna um rusl á víðavangi til eftirlitsaðila.