Ýmir Örn Gíslason ekki með í landsleikjunum

Íslenska karlalandsliðið í handbolta kom saman til æfinga í Safamýri í dag. Hluti leikmannahópsins er enn á leið til landsins, en þeir leikmenn sem spiluðu með félagsliðum sínum erlendis í gær eru á gangi. Landsliðsþjálfari Snorri Steinn Guðjónsson segir nær alla leikmenn heila fyrir komandi leiki, en staðan á einhverjum lemstruðum leikmönnum verði skoðuð í dag.

Línumaðurinn og varnardrekinn Ýmir Örn Gíslason verður ekki með í landsleikjunum fram undan. Ýmir fór í handaraðgerð í sumar og hefur ekkert spilað með liði sínu, Göppingen í Þýskalandi, á þessari leiktíð. Hann er nú hér á landi til frekari skoðunar og vonaðist til að fá skýrari mynd síðar í dag eða á morgun með tímaramma á bataferlinu.

Ísland tekur á móti Úkraínu í fyrsta leik sínum í undankeppni EM 2028 í Laugardalshöll á miðvikudagskvöld. Einungis um 100 miðar eru óseldir á leikinn. Íslenska liðið æfir svo áfram til laugardags þegar það ferðast til Eistlands og spilar við heimamenn þar á sunnudag. Báðir leikirnir verða sýndir á rásum RÚV.