Yfirvöld gefa út almannavarnabæklinginn „Verum viðbúin"

Almannavarnadeild ríkislögreglustjóra gefur í dag út bæklinginn „Verum viðbúin", sem ætlað er að efla viðbúnað almennings og styrkja seiglu samfélagsins. Bæklingurinn verður sendur rafrænt í gegnum Ísland.is og á verumvidbuin.is, og dreift í prentaðri útgáfu á völdum stöðum um land allt frá miðvikudegi til sunnudags með aðkomu björgunarsveita Landsbjargar. Bæklingnum er ætlað að veita almenningi upplýsingar um hvernig hægt er að undirbúa sig fyrir aðstæður sem geta raskað daglegu lífi. Þar eru nefnd sem dæmi náttúruhamfarir, óveður, rafmagnsleysi, fjarskiptatruflanir og aðrar samfélagslegar áskoranir. Atburðir á borð við eldgos og jarðskjálfta á undanförnum árum hafi minnt á mikilvægi þess að einstaklingar og fjölskyldur séu undirbúin þegar óvæntar aðstæður skapast. Runólf Þórhallsson, yfirlögregluþjóni almannavarnadeildar ríkislögreglustjóra, segir að viðbúnaður sé ekki einungis verkefni stjórnvalda heldur okkar allra. „Þegar einstaklingar og fjölskyldur gera einfaldar ráðstafanir til að búa sig undir mögulegar truflanir eykst öryggi samfélagsins í heild," segir hann. Í bæklingnum er fjallað um hvar hægt er að nálgast áreiðanlegar upplýsingar og hvaða búnaður getur verið gagnlegur á heimilinu, svo sem útvarp sem gengur fyrir rafhlöðum, hleðslubanka, vasaljós og lyf. Fyrstu eintök verða afhent ráðherrum að loknum ríkisstjórnarfundi í dag.