Helga Dögg Sverrisdóttir segir frá erfiðum starfslokum vegna gagnrýni á kynvitundarfræðslu

Helga Dögg Sverrisdóttir, fyrrverandi kennari við Síðuskóla á Akureyri, segir að opinber gagnrýni hennar á kynvitundarfræðslu í grunnskólum hafi orðið upphafið að langvarandi átökum við skólastjórnendur og samstarfsfólk. Hún lýsir félagslegri einangrun, breytingum á starfsskyldum og veikindum sem urðu til þess að hún sneri ekki aftur til kennslu.

Þann 14. apríl 2023 birtist grein eftir Helgu Dögg í Morgunblaðinu þar sem hún gagnrýndi aðkomu Samtakanna '78 að skólastarfi og hugmyndir um kyn og kynvitund. Helga hefur meðal annars gagnrýnt þá nálgun að kyn sé félagslegt fyrirbæri fremur en líffræðilegt. Þótt skoðanir hennar kunni að vera umdeildar, telur hún sig hafa verið að taka þátt í lögmætri þjóðfélagsumræðu um menntun og velferð barna.

Samstarfsfólk hennar lét taka af sér hópmynd með regnboga- og transfánum og birti hana opinberlega á Facebook með orðsendingu beint gegn henni. Helga upplifði myndbirtinguna sem opinbera afstöðu gegn sinni persónu og segir andrúmsloftið á vinnustaðnum hafa breyst verulega. Sérstaklega hafi verið óheppilegt að trúnaðarmaður kennara hafi tekið þátt í gjörningi þessum.

Helga var boðin á fund skólastjóra Síðuskóla, Ólafu Ingu Andrésdóttur, og mannauðsstjóra Akureyrarbæjar 24. apríl 2023. Hún segir að henni hafi verið lagt fram skjal til undirritunar sem hefði takmarkað rétt hennar til að tjá sig opinberlega um kynvitundarmál, jafnvel utan vinnutíma. Helga kveðst hafa neitað að undirrita skjalið. Lögmaður hennar, Eva Hauksdóttir, sendi skólastjóranum bréf daginn eftir fundinn þar sem hún varaði við því að framganga stjórnenda væru farin að bera keim af einelti.