Íris Helga Jónatansdóttir sögð hafa beðið menn að lemja brotaþola
Tveir karlmenn báru vitni í Héraðsdómi Reykjaness um að Íris Helga Jónatansdóttir hefði beðið þá um að lemja einn brotaþolann. Hún er ákærð fyrir umsáturseinelti, ærumeiðandi aðdróttanir, skjalafals, rangar sakargiftir og barnaverndarlagabrot og neitar sök.
Þriðji dagur aðalmeðferðar í máli Írisar Helgu Jónatansdóttur fór fram í Héraðsdómi Reykjaness. Tveir karlmenn báru vitni um að hún hefði beðið þá um að lemja einn brotaþolann. Annar mannanna sagðist hafa fengið skilaboð um að "lemja manninn, láta lemja hann eða eitthvað þess háttar". Hinn maðurinn sagði Írisi Helgu hafa sent sér snap þar sem hún bað hann um að lemja brotaþolann og fylgdu með vídeó af húsi hans og heimilisfang. Báðir neituðu beiðninni.
Tvær fyrrverandi vinkonur Írisar Helgu báru einnig vitni og sögðust hafa slitið vinskapnum árið 2022 vegna lyga hennar. Ein þeirra sagðist hafa farið á rúntinn með Írisi Helgu þar sem ekið var fram hjá húsi brotaþolans. Kona sem var í þriggja mánaða sambandi við brotaþolann bar vitni um að Íris Helga hefði haft samband við sig og spurt út í samskipti hennar við manninn.
Unglingsdóttir Írisar Helgu bar vitni að eigin vali og sagði móður sína aldrei hafa beðið sig um að gera neitt óeðlilegt. Hún lýsti því einnig að bróðir sambýliskonu brotaþola hefði ráðist inn á heimili þeirra og hótað að drepa þær. Alls voru sex dagar teknir frá fyrir aðalmeðferðina.
