Sonur látinn laus úr einangrun í manndrapsrannsókn í Breiðholti
Maður á fertugsaldri sem var handtekinn vegna gruns um manndráp í Breiðholti hefur verið látinn laus úr einangrun og ber við neyðarvörn. Faðir hans var þegar látinn laus úr haldi.
Maður á fertugsaldri sem var handtekinn um síðustu helgi vegna gruns um manndráp í Breiðholti hefur verið látinn laus úr einangrun. Hann ber við neyðarvörn og segir að hafi verið að verjast árásum.
Faðir mannsins, sem er á sextugsaldri, var látinn laus úr haldi daginn áður. Til átaka kom á milli feðganna og tveggja manna í Breiðholti aðfaranótt sunnudags. Sonurinn beitti hnífi og lést annar þeirra sem varð fyrir stungunum. Hinn særðist talsvert en er ekki í lífshættu.
Samkvæmt heimildum fréttastofu náðist atburðarásin á eftirlitsmyndavél. Allir mennirnir höfðu áður en til átakanna kom verið á sportbarnum Álfinum í Hólagarði í Breiðholti, þar sem þeir sáust eiga samskipti.
Gæsluvarðhaldskrafan yfir syninum rennur út á mánudagsmorgun, 9. nóvember. Lögmaður hans, Elimar Hauksson, segir líklegt að farið verði fram á framlengingu varðhaldsins, en að slíkri kröfu verði andmælt á grundvelli neyðarvarnar. Samkvæmt upplýsingum frá lögreglu miðar rannsókn vel og fáir lausir endar eftir.
