Tíundi sakborningur Straumsvíkurmálsins í gæsluvarðhaldi til 9. desember

Tíundi sakborningurinn í Straumsvíkurmálinu var leiddur fyrir dómara í kvöld og úrskurðaður í gæsluvarðhald til 9. desember, eins og Ævar Pálmi Pálmason, aðstoðaryfirlögregluþjónn hjá lögreglunni á höfuðborgarsvæðinu, staðfestir.

Maðurinn kom til landsins í dag með flugi frá Rúmeníu og er ásamt níu öðrum ákærður fyrir innflutning á yfir 100 kílóum af kókaíni sem falin voru í sjókistu súrálsskips sem kom til hafnar í Straumsvík í júní. Hann kom hingað með farþegaferjunni Norrænu í fyrri hluta júnímánaðar með sendiferðabíl fullum af köfunarbúnaði.

Fáeinum vikum síðar notuðu hinir sakborningarnir búnaðinn til að kafa eftir 106 kílóum af kókaíni sem falin voru í sjókistu búlgarska súrálsskipsins Koznitza við bryggju í Straumsvíkurhöfn. Maðurinn var þá floginn úr landi og eftir að hinir níu voru handteknir var gefin út alþjóðleg handtökuskipun á hendur honum. Hann var handtekinn í Rúmeníu fyrir nokkrum vikum.

Hinir níu sakborningarnir neituðu allir sök þegar málið var þingfest í Héraðsdómi Reykjaness. Aðalmeðferð í málinu er áætluð til að hefjast 2. desember.