Michael Carrick væntanlega rekinn frá Manchester United

Breskir fjölmiðlar keppast um að fullyrða að dagar Michael Carrick sem knattspyrnustjóri Manchester United séu liðnir. The Athletic tilkynnti að búist væri við því að hann yrði rekinn og samkvæmt BBC mun ákvörðunin verða tekin í dag eða á næstu dögum.

Samkvæmt The Guardian eru Jason Wilcox, yfirmaður fótboltamála, og Omar Berrada, framkvæmdastjóri, á leið til Mónakó að hitta eigandann Sir Jim Ratcliffe og munu þar leggja til að Carrick verði látinn fara. Manchester United er í 18. sæti ensku úrvalsdeildarinnar með eingöngu átta stig eftir tíu deildarleiki. Nú er hlé á deildinni vegna landsleikja og tímapunkturinn gæti því hentað í þjálfaraskipti.

Carrick tók við liðinu í janúar eftir að Ruben Amorim var rekinn, fyrst til bráðabirgða en í maí skrifaði hann undir samning til 2028. Nú þykir afar ólíklegt að hann fái að klára samninginn.

Nokkrir þjálfarar hafa verið nefndir sem mögulegir arftakar Carrick, þar á meðal Antonio Conte, Julian Nagelsmann og Eddie Howe. Mauricio Pochettino, sem þjálfar bandaríska karlalandsliðið, hefur þótt líklegastur undanfarna daga. Pochettino hefur áður þjálfað Southampton, Tottenham og Chelsea í ensku úrvalsdeildinni auk PSG í Frakklandi. Í samningi hans við Bandaríkin er klásúla sem gerir honum kleift að yfirgefa landsliðið gegn greiðslu um 7 milljóna punda.