Dönsk kirkja til sölu fyrir eina krónu

Morten Graversen, formaður barna- og fræðslunefndar sveitarfélagsins Struer á Vestur-Jótlandi í Danmörku, segir að kirkjan sé til sölu fyrir mjög lágt verð. Þegar hann var beðinn um að tilgreina verðið nákvæmlega svaraði hann: „Ég myndi næstum segja eina krónu. Þannig að þetta er nokkuð ódýrt." Sveitarfélagið fékk kirkjuna að gjöf árið 2025 þegar frísöfnuðurinn í Voldhøj var lagður niður. Þar sem sveitarfélagið hefur ekki not fyrir húsnæðið vill það finna kaupanda. Graversen bendir á að það myndi kosta sveitarfélagið um 450 þúsund danskar krónur, eða um 8 milljónir íslenskra króna, að rífa bygginguna. Því sé þess virði að kanna hvort einhver hafi áhuga á að taka húsnæðið yfir. Struer er tæplega tíu þúsund manna bær sem stendur við Venø-flóa í Limafirði. Bærinn er þekktastur fyrir að hýsa höfuðstöðvar raftækjafyrirtækisins Bang & Olufsen, þar sem um fimmtungur bæjarbúa starfar.