Bandarísk þingkosningar á þriðjudag – öldungadeild ómöguleg að spá fyrir um

Tveir dagar eru til þingkosninga í Bandaríkjunum þar sem kosið er um þriðjung sæta í öldungadeild þingsins og öll sætin í fulltrúadeildinni. Kosningarnar geta haft mikil áhrif á möguleika Donalds Trumps Bandaríkjaforseta til að ná sínum áherslum í gegn. Indriði H. Indriðason, prófessor í stjórnmálafræði við Kaliforníuháskóla í Riverside, segir að Demókratar eigi sigurinn vísan í fulltrúadeildinni. Baráttan um öldungadeildina sé hins vegar meira spennandi og hnífjöfn samkvæmt skoðanakönnunum. „Þar má eiginlega segja að sé hnífjafnt þegar horft er á spurningakannanirnar og í raun bara ómögulegt að spá fyrir um hvernig það fer. En það virðist vera að Demókratarnir séu metnir örlítið líklegri til að ná meirihluta, en það munar mjög litlu," segir Indriði. Stór spurning sé hvernig kjörsókn verður, þar sem Trump hafi hrapað í vinsældum. Indriði bendir á fjögur ríki sem líkleg eru til að ráða úrslitum: Ohio, Alaska, Kansas og Texas. Í öldungadeildinni séu um tólf til fjórtán fylki þar sem báðir frambjóðendur eigi möguleika á að vinna, en restin sé fyrir fram ákvörðuð sem sterk Demókrata- eða Repúblikanaríki. Niðurstaða kosninganna um öldungadeildina muni því líklega ráðast af þessum fjórum fylkjum.