Sæmi Rokk Pálsson, rokkdansari og vinur Bobby Fischer, er látinn
Sæmi Rokk Pálsson, fyrrverandi lögregluþjónn, leikari og dansari, er látinn 90 ára gamall. Hann var þekktur fyrir vináttu sína við skákmeistara Bobby Fischer og starfaði sem lífvörður hans.
Sæmi Rokk Pálsson, áður Sæmundur Pálsson, er látinn 90 ára gamall. Hann var fyrrverandi lögregluþjónn, lífvörður, leikari og dansari sem vakti mikla athygli á unglingsárum sem rokkdansari. Árið 2018 breytti hann nafni sínu úr Sæmundur Pálsson í Sæmi Rokk.
Sæmi átti eftirminnilega innkomu í kvikmyndinni Með allt á hreinu frá 1982 þar sem hann lék persónuna Óliver Tvist. Hann er þó kannski best þekktur fyrir víðfræga vináttu sína við skákmeistara Bobby Fischer. Þeir kynntust í Reykjavík árið 1972 þegar Fischer háði skákeinvígi við rúsneska Boris Spassky. Sæmi starfaði um tíma sem lífvörður Fischer og aðstoðaði hann við að flytja til Íslands eftir að Fischer hafði setið í fangelsi í Japan í tíu mánuði.
Fischer var veitt íslenskt ríkisfang af mannúðarástæðum 22. mars 2005 og lést þremur árum seinna. Friðrik Guðmundsson gerði síðar heimildarmyndina Me and Bobby Fischer um samband Sæma og Fischer og baráttu Sæma fyrir því að fá vin sinn hingað til lands.
Sæmi eignaðist fjögur börn með eiginkonu sinni Ásgerði Ásgeirsdóttur. Hann lætur eftir sig ellefu barnabörn og enn fleiri barnabarnabörn.
